Në kuadër të zhvillimit të statistikave të Kërkimit Shkencor dhe Zhvillimit dhe forcimit të statistikave në vend, më datë 09 Korrik 2020, Instituti i Statikave (INSTAT) nënshkroi një marrëveshje bashkëpunimi me Agjencinë Kombëtare të Kërkimit Shkencor dhe Inovacionit (AKKSHI). Institucionalizimi i bashkëpunimit midis autoriteteve përfaqëson një hap të rëndësishëm në zbatimin e prioriteteve strategjike të të dy institucioneve. Kjo marrëveshje synon zhvillimin në nivel teknik dhe operacional të bashkëpunimit tashmë të konsoliduar mes INSTAT dhe AKKSHI.

Marrëveshja e Mirëkuptimit mundëson rritjen e efektivitetit në koordinimin e aktiviteteve dhe funksioneve të këtyre institucioneve, si dhe shkëmbimin e informacionit dhe eksperiencave në mënyrë të vazhdueshme, për realizimin e objektivave publike respektivë. Në veçanti, kjo marrëveshje vendos urat e bashkëpunimit në nivel operacional ndërmjet të dy autoriteteve lidhur me të dhënat bazë për Kërkimin Shkencor dhe Zhvillimin në vend.

Informacioni i dy institucioneve do të jetë një burim shumë i rëndësishëm për prodhimin e statistikave bazë për Kërkimin Shkencor dhe Zhvillimit në vend. Këto statistika kanë një rol të veçantë për politikë-bërjen dhe për nevoja të raportimit në Komisionin Evropian, si pjesë e statistikave të kapitullit 18 “Statistikat” dhe kapitullit 25 “Shkenca dhe Kërkimi Shkencor”.