Studimi Shqiptar mbi Përdorimin e Kohës (SSHPK) aplikon udhëzimet e Eurostat-it për Studimet e Harmonizuara Europiane për Përdorimin e Kohës (HETUS). Në udhëzime janë përshkruar tërësisht konceptet e HETUS-it. Informacioni për përdorimin e kohës mblidhet nëpërmjet një ditari me intervale kohore fikse (10 minutëshe) në të cilin personat e intervistuar vetë-regjistrojnë përdorimin e kohës së tyre për dy ditë ditari të përzgjedhura në mënyrë të rastësishme. Në ditar regjistrohet një aktivitet kryesor, një aktivitet paralel ose i njëkohshëm, vendi ku kryhet aktiviteti, mjetet e transportit dhe prania e personave të tjerë. Personat që marrin pjesë në studim intervistohen disa ditë më parë ditëve të përzgjedhura për plotësimin e ditarëve, dhe i’u përgjigjen pyetjeve të dy pyetësorëve që lidhen me kushtet e njësisë ekonomike familjare dhe ato individuale. Metoda e HETUS-it është e dokumentuar me detaje nga Eurostat-i. Popullsia e synuar për Studimin Shqiptar mbi Përdorimin e Kohës përfshin të gjithë rezidentët në Shqipëri të moshës 10 vjeç e lart. Njësia e zgjedhjes është Njësia Ekonomike Familjare(NjEF) dhe të gjithë anëtarët e NjEF 10 vjeç e lart. Baza e zgjedhjes e përdorur për SSHPK-në bazohet në të dhënat përmbledhëse për zonat e numërimit nga CENSUS-i i vitit 2001. Ajo është stratifikuar (shtresëzuar) në katër zona (strata) gjeografike (Qëndrore, Bregdetare, Malore, dhe Tirana urbane). Kampioni është zgjedhur në mënyrë të pavarur në secilën stratë sipas një proçedure zgjedhjeje dy-hapëshe. 

 Baza ligjore

• Ligji 17/2018 “Për statistikat zyrtare”.

Variablat kryesorë të Anketës së Përdorimit të Kohës:

• Koha mesatare për aktivitetet e ndryshme

• Raporti i individëve që kaluan disa kohë për për kryerjen e aktiviteteve

Përkufizime

Periudha e referencës është kohëzgjatja së cilës i referohet  vetë-regjistrimit  të përdorimit të kohës për dy ditë të përzgjedhura në mënyrë të rastësishme.

Një njësi ekonomike familjare (NjEF) i referohet një grupi personash ose një personi me lidhje gjaku ose jo të cilët banojnë së bashku në një banesë dhe që ndajnë një ekonomi pjesërisht ose plotësisht të përbashkët.

Kryefamijari është një person, që përcaktohet si i tillë për qëllimet e anketës (person që është pronar i banesës ose person i identifikuar si i tillë nga anëtarët e tjerë të NjEF). Nëse anëtarët e NjEF nuk e përcaktojnë vetë këtë person, normalisht do të jetë personi që kontribuon më shumë në të ardhurat totale të NjEF.

Individë  të përzgjedhur për intervistim është konsideruar çdo individ mbi moshën 10 vjeç.